O le faaali o le lagolago a le aufaigaluega a le Faletupe o le Pasefika le BSP i le Sosaiete o le Kanesa a Samoa ua ala atu ai le latou foai e oo atu i le $4,500 le aofai atoa. 

I le aufaigaluega atoa e to’a 101 na tau fai togimaa uma e ala i lea fesoasoani ma e pei ona iloa ai le masina o Oketopa i tausaga taitasi e faatāua ai polokalame faalauiloa o le tetee atu i le kanesa poo le Pinktober. 

I lipoti a le Samoa Global News na faailoa ai lenei foai na tauaaoina ina ua mae’a se tasi o aoaoga a le Sosaiete na talanoaina ai le ogaoga o lenei faamai ma le toatele o tagata ua ma’umau ai soifua ona o le Kanesa. 

I lea foai $4,500 na mafai ona maua mai i le $2,000 a le vaega a le Retail,  mai le tele o a latou faalauiloa sa faia e pei o le faatauina o sei ma cupcakes, ae o le vaega a le Finance & Operations e oo atu i le $1,000 tala le latou tupe na maua mai le faatauina o lipine lanu piniki. 

Na ta’ua e le faauluuluga a le BSP ia Jennifer Ula-Fruean o le naunautaiga ina ia mafai ona fesoasoani le latou foai i polokalame faasolo a le Sosaiete e tetee atu ai i le sauā o le Kanesa i totonu o le atunuu.