Ua faamaonia mai i lipoti a le Lakapi Liki le siitia maualuga o le numera o tagata na maimoaina le taamilosgaa lakapi liki i le lalolagi e le gata o taaloga a alii ae faapea tamaitai.
Mo le auala faasalalau a le BBC e lata i le 30 miliona i latou na mafai ona maimoaina lea taamilosaga atoa ma o se matati’a tāua lea mo le taaloga a le Lakapi Liki.
I taaloga e 61 o lea taamilosaga o le taaloga aupito sili ona toatele i latou na maimoaina i luga o upega tafailagi e tusa lea ma le 2.8 miliona ma le 23% (audience share) o le taaloga i le va o le Toa Samoa ma le ‘au a Egelani i le Semi Finals lea na saili ai se ‘au e ofi atu i le sailiga siamupini.
Na manumalo le Toa Samoa i lea taaloga ma avea ai ma uluai ‘au o le Pasefika poo le Tier 2 ua saofagā atu i le sailiga siamupini o le Ipu o le lalolagi.
Na telē le sao a le Toa Samoa i le unai atu o le toatele o tagata e maimoaina le Lakapi Liki ina ua molimoli mai se faamanuiaga a le alo lauiloa o Samoa i ata tifaga, o Seiuli Dwayne Johnson.
O le faaiuga o lenei taamilosaga na manumalo ai Ausetalia i le ‘au a alii faapea tamaitai.
