Ua tuuina mai se lapataiga mai le malo o Ausetalia i tagata Ausetalia o loo faimalaga i atunuu i fafo ina ia faaaloalogia tu ma aganuu ma tulafono a atunuu o loo faimalaga iai.
Ua faia mai lea tulaga ona o nisi o mataupu ua tulai mai e aofia ai ma nisi ua toe tipoti ese mai.
O le lapataiga ua faailoa ai i tulisi e ao ona suesue i tulafono faalotoifale ma ia usitaia tulaga ia ona e itiiti se fesoasoani a le malo o Ausetalia e mafai ona tuuina atu ia i latou pe afai ae aafia mai i tulafono a ia atunuu e malaga atu iai.
O le fautuaga lea e pei ona faailoa i luga o le upega tafailagi le smartraveler e pei ona faailoa ai i le aso ananafi.
Fai mai le faasilasilaga i tagata e le mafai e le malo ona aveese mai oe mai se tulaga e te aafia ai i atunuu ese, aveese mai ma le falepuipui pe totogi foi au pili faaletulafono poo ni faasalaga.
O nisi o mataupu ua ta’ua mai i le lipoti lea e aofia ai tagata Ausetalia ua aafia i tulafono i totonu o Indonesia e mafua mai ona o le lē usitaia o aiaiga ma taiala faataatitia a ia atunuu.
O lea la ua faamanatu mai le malo e ala i le lapataiga lea afai e te malaga i fafo atu o Ausetalia, malaga lelei ma ave lau tu faaaloalo ma fai le mea e tatau ona fai ae lē o le ulagia o tu ma aga a isi atunuu aua o le isi aafiaga tele o le faalēaogā mai e le atunuu lea o lou visa ma lē mafai ai ona e oo i le mea o loo e fia faimalaga iai.
