O loo iai lamatiaga mai uila ma faititili i le faaitu i Matu o le atunuu e aofia ai le North Island, Buller ma Westland.
O le faamatalaga a le vaaitau lea ua aofia uma atu ai ma le vaega pito i luga o le North Island ma isi faaitu e pei ona ta’ua ma o loo iai foi le avanoa e ono aafia ai foi i se asiosio poo se tornado.
Mo Northland lava ia ua fautuaina i uiga loulouā o le tau e pei o uila ma faititili e amata atu i le 11 i le taeao nei e oo i le ta o le 6 i le afiafi nanei ae mo isi faaitu e aofia ai ma Aukilani, Bay of Plenty, Taranaki ma Taupo, o loo fautuaina mai le ta o le 2 i le aoauli agai i le 8 i le afiafi.
O loo fautuaina foi i timuga mamafa ma ua fautuaina le faaeteete i luga o alatetele ona o le a maseesee foi mai timuga.
O le faaauau pea o nei uiga louloua o le tau ua tulai mai ae faatoa mae’a foi ona aafia Niu Sila i asiosio e fā na aafia ai East Auckland i le po o le Aso Sa talu ai, Tasman region i le aoauli o le aso ananafi, Taranaki i le po anapo ma le Kapiti Coast lea na aafia i le taeao analeila.
