Fai mai le vaaitau e mamafa le aisa poo le snow o le a pa’ū i le South Island atoa ai ma timu to faata’uta’u e ono aafia ai le North Island i le asō. O loo fautuaina nei ia vaega o le atunuu i tulaga o uiga loulouā o le tau ma ua faailoa e le vaaitau se lapataiga mo luga o alatetele aemaise i le Crown Range Road, Lindis Pass ma Milford Road.
Ua faailo foi e le Waka Kotahi NZ Transport Agency o le ‘afa o le fā i le afiafi nei o le a tapunia ai le East Gate agai i le West Gate ma faato’ā toe tatala pe a talafeagai ma tulaga o le tau.
Ua fautuaina foi tagata i matagi malolosi e pei ona faamaonia e le vaaitau aemaise o timu aisa e ono faaleagaina ai meatotino aemaise taavale. Faaopopo atu i ia lapataiga nisi o faamanatu i tagata ia tautuana ia usitaia fautuaga i nofoaga i gataifale ona o le a lē taumate le siisii foi o le suavai ona o timuga ma galu o le a siitia foi le maualuluga.
