Ua lapatai mai le IMF poo le International Monetary Fund ia Niu Sila e foliga o le a matuai aafia i tulaga tau le tamaoaiga.
O le silasila i le lumanai i le tausaga lenei mo Niu Sila ua ta’ua ai i le lipoti a le Newstalk o Niu Sila le isi atunuu o le a maualalo le GDP poo le tuufaatasiga o oloa ma auaunaga e gaosia ma faia i totonu o le atunuu ae o le a avea foi o se tasi o atunuu o le a maualuga ai le inflation poo le siitaga faaopoopo i le tau masani o oloa i le itulagi a Asia ma le Pasefika mo ni nai tausaga o lalata mai.
O se mataupu ua faatalanoa e i latou e telē le silafia i tulaga tau tupe ma le tamaoaiga e pei o le polofesa mai le iunivesite o Aukilani, Robert MacCulloch lea na ia ta’ua i le Newstalk o Niu Sila sa maualuga iai le silasila a le lalolagi i faataitaiga tau le tamaoaiga peitai e foliga o lea a avea o se tasi o atunuu aupito mafatia lona tamaoaiga.
