Ua lapata’ia e leoleo a Kuiniselani i latou e fiafia e maimoaina taaloga lakapi aemaise aiga ma uo a le autaaalo ina ia faaeteete i nisi o faiga taufaasese o loo fetaua’ina e faaaogā ai pepa maimoa mo le taaloga faai’u ma le sailiga o le siamupini o le Origin i le tausaga nei.
Fai mai le leoleo su’esu’e o Michael Newman mai le ofisa o leoleo i Kuiniselani o pepa matamata e masani ona faatau i luga o le facebook ma le gumtree e masani ona faigata ona talitonuina e moni.
Ta’ua e leoleo ua o latou vaai i nisi o tagata ua oo i le 10 afe ua lusi ai i le taumafaiga e faatau se pepa matamata ma e ao ona silasila i nisi o tulaga e pei o le mafai ona faaali sa’o mai o le pepa matamata moni ia te oe.
Ua na o le Ticketek le upega tafailagi o loo ua lesitala e faatauina tickets ia. O i latou e fia maua pepa matamata e lelei ona aga’i i le upega tafailagi lea e maua ai pepa matamata.
Ua faamanatu mai foi e leoleo o le faasalaga aupito mamafa o le faatau ticket sese ma faiga taufaasese ia o le totogi o le silia ma le 2 afe tala Ausetalia.
