Ua iai se lapataiga ua tuuina e se taitai leoleo i Kuiniselani i mātua ina ia silasila ia latou fanau ma le faaaogāina o le initaneti aemaise ua faatupulaia se isi ituaiga tulaga ua maitauina i luga o upega tafailagi e aofia ai ni kegi.

Fai mai lipoti talu mai le maliu o le tina matua o Vyleen White i le taulaga faatau i Redbank Plains i se taimi e lei mamao atu ua iai se isi ituaiga amioga ua maitauina e leoleo i upega tafailagi e ta’ua o le Drill Rap.

O talavou e toalima na pueina i le maliu o lea tina, o le isi toatasi e iai lona sootaga i kegi e aofia i le faiga lea Drill Rap, o se faiga e unaia ai ma faalauiloa ai faiga saua violence e faaaogā ai musika.

I Niu Sa Uelese foi e pei ona ta’ua ua loa foi tausaga o feagai ma lea ituaiga faafitauli ma o loo iai se vaega o leoleo poo se unit o loo latou mataituina lea tulaga ae manatu le taitai leoleo e lelei i mātua ona silafia lea ituaiga faafitauli ma silasila pe lē o aafia le fanau a o faaaogāina le initaneti.

E manatu leoleo e mafai e ia faiga ona faaaogā le fanau e unaia ai ma faalauiloa le faia o uiga fia malosi ma saua i tagata.