Ua faamatuu atu se lapataiga a le Consumer NZ i paaga a le HelloFresh ina ia siaki a latou pili ona e toatele ua ta’ua o loo pili atu latou i nisi o taumafa e lei aofia ia latou oka.
O le faauluuluga o le Consumer NZ o Caitlin Cherry sa ia faailoa i le Newstalk o le mataupu lea ua faaumiumi ona matauina ma ua silia ma le tolu tausaga o tupu pea ae o loo mautu lava le finau a le HelloFresh o loo sa’o latou.
O loo iai nisi oka a tagata faatau o loo talosaga ai e faamisi nisi vaiaso ona o taimi e toesea ai ma aiga mo malologa poo nisi foi fuafuaga.
O i o loo alia’e ai le faaletonu ona e foliga o loo faaauau pea ona charge pe pili mai e le kamupani le oka lea aemaise foi o subscription ua mae’a ona faaleaogaina.
Fai mai Cherry ua tele faaseā ua oo atu ia i latou ona o lea mataupu aemaise foi o le app o loo faaaogaina e lea auaunaga.
E ui i lea faamatalaga a le Consumer NZ ae o loo aofia ai i le lipoti ma se faamatalaga mai se sooupu a le kamupani HelloFresh ua ta’ua ai e le o iai ni faaletonu poo ni tulaga faapea o tulai mai i le app poo le upega tafailagi foi.
O le lapataiga la ua tuuina nei e le Consumer NZ i paaga a le HelloFresh e lelei ona pue lelei i le telefoni ni faamaumauga o taimi e talosaga ai e taofi pe faaleaogaina se oka ina ia maua ai ni faamaoniga o faitioga o loo oo atu ia i latou ma ia maua vave ai se fofo o le faafitauli.
