Ua faaalia e nisi o tagat na api i le tolauapiga i Mount Maunganui, o le mala lea na o latou molimauina i le aafia atu ai o ia faaitu i se eleele solo tele, e pei ona faamauina ai le matua’i faaleagaina o fale ma taavale o ituaiga o caravans i le palapala.
Faamauina le to’atele o tagata o loo tau sa’ilia, e aofia ai ma ni fanauiti, e masalomia o loo tanumia i le palapala.
I faamatalaga mai i auala o faasalalauga a le leitio faavaomalo a Niu Sila, na māua ai na aafia le nofoaga o le Beachside Holiday Park poo le ‘afa tonu lava o le itula e iva i le taeao o le Aso Tofi (9:30am) ma faaleagaina ai le tele o meatōtino.
Lipotia mai le galulue ai o le auunaga o faalavelave tutupu faafuase’i, e aofia ai le Urban Search and Rescue i le po atoa e sa’ili ma lavea’i mai le to’atele o loo leiloloa mai.
Ma ona o ia foliga vaaia ma tulaga pagatia ua fetaia’i ma aafiaga o lea faalavelave faalenatura, o lea ua faailo ai le mata’u ma le fefe tele o se tasi o turisi, o se tagatānuu Kanata i tulaga na ia molimauina aemaise lava le toeitiiti a aafia atu ai ma si ona aiga.
I se faatalanoaga a le Minisita o Faalavelave Tutupu Faafuase’i Emergency Management, Mark Mitchell ma tusitala na ia faamaonia ai e iai se teineitiiti o loo aofia ai i tagata o loo sa’ilia nei.
E lē o mailoa lelei le numera o tagata o loo tau sa’ilia i le taimi nei, ae o loo iai le talitonuga a leoleo, e lē sili atu ma le to’a 10 i latou.
E tele helikopa ua fesoasoani atu i lenei galuega fitā.
Ae i se isi o matāupu, mai lenei faalavelave faalenatura, o lea na lipotia mai i faaitu o Welcome Bay, le maua ai o ni tino maliliu se lua, mai se eleele solo.
E tasi le tagata na avatu i le falema’i i mo manu’aga tugā, ma ua faamauina le tele o fale na faaleagaina.
Ua faaalia le tuuina o ia tino maliliu i le ofisa o le pule o maliu poo le Coroner.
Ae i se tala lata mai, o lea ua faamaonia mai o ia tagata e to’alua ua maliliu, o se tinā matua ma si ona alo poo si ona grandchild.
Puna o Faamatalaga: https://www.rnz.co.nz/news/national/584731/witness-describes-real-disaster-as-mauao-landslide-strikes-mount-maunganui-campground
