Ua faailoa e le Minisita o Leoleo Falepuipui ma le Ola Toe Fuataina le aafiaga tele o le atunuu ona o le faaletonu o le vaa leoleo o le Nafanua lea na faimeaalofa atu ai le malo o Ausetalia. Taua e Faualo Harry Schuster e lagona le maasiasi ona o lea tulaga.
O lea ua amata nei faatalatalanoaga a le Matagaluega o Leoleo ma Falepuipui ma le ofisa o Iapani i Apia se fesoasoani a lea malo e aumai ai se vaa leoleo mo lea Matagaluega ina ua tuufua ai nei le nofoaga o le uafu tele i Apia na faamautu ai le vaa leoleo o le Nafanua II le aua faaleagaina ma ua toe ave i le malo o Ausetalia na aumai ai lea fesoasoani e $30 miliona tala lona tau aofai.
Faaalia e le Minisita o le vaa o le a aumai e le malo o Iapani e laititi ifo nai loo le Nafanua II. O le faaleagaina o lea vaa leoleo e lei atoa se tolu tausaga talu ona auina atu i Samoa e sui a’i le vaa leoleo muamua.
“O le mea muamua a o se faanoanoaga tele ua lē aoga lenei aseta taugata a le malo a’o le aseta foi e telē lona aoga i le puipuiga o le tatou gataifale a’o lea ua maimau e le’o atoa se tolu tausaga. O le isi vaega e lagona ai le faanoanoa ma le matamuli ona o le aseta na faameaalofa mai e le malo o Ausetalia o le aseta foi o se vaa i le fausaga fou ia e iai e taugata le vaa toe e computerise uma, lea la ua maimau le aseta. Pau le tatalo lea e iai talosia e toe malilie ma talia e Ausetalia pe latou te toe aumai se vaa fou. O le mea lea e matamuli ai le tatou malo o le telē o le faaletonu o le mea lea o le taugata o le vaa e lei atoa se tolu tausaga ae o tulaga ia na aafia ai le vaa e tau taliagatā le faamalamalamaga o le mafuaaga na oso ai le vaa i luga o le aau ae tatou tlaia poo le a se finagalo o Ausetalia pe toe aumai se vaa e sui ai le vaa lea. O le tulaga ogaoga tetele a lena o le puipuiga o le tatou ogasami ona o le vaega fapaitoa a lea e faapitoa ai le tatou aseta lea o le puipuiga o le tatou gataifale ia aua nei iai le tulaga e soli tulaga tau solitulafono faapea le fagotaina e v aa o isi atunuu o le tatou ogasami e aunoa ma le faanoi mai ia tatou.”
Faailoa foi e le Minisita ua amata faagasolo tapenaga mo le faatinoga o galuega o le komisi suesue ua filiiflia ona sui e saili tonu ai le mafuaaga na pa’ulia ai le Nafanua II.
