Ua faamauina nei i talafaasolopito o le faamasinoga faavaomalo le International Court of Justice i le atunuu o Netherlands, le sao o Samoa i folasaga faaletulafono i le mataupu o suiga o le tau e pei ona auai le Loia Sili a lo tatou malo le susuga Su’a Hellene Wallwork ma le Ofisa Sili o pulega o le matagaluega o le va i fafo ma fefaataua’iga, le Afioga Peseta Noumea Simi, ma se loia sinia o le ofisa o le Loia Sili a le Malo o Samoa.

E 96 atunuu o loo tuuina atu a latou folasaga ma finauga faaletulafono e aofia ai Samoa ae 11 faalapotopotoga tuma’oti.

O le to’atele o atunuu o loo auai o malo laiti tau atia’e e aofia ai malo laiti o le Pasefika lea o loo ta’imua ai le atunuu o Vanuatu i le finauga e ao i atunuu o loo pito tele lo latou sao tau tamaoaiga i suiga ma’ale’ale o le tau ona mautali atu i aafiaga o atunuu laiti.

O se avanoa lea ua faaleo ai e atunuu laiti tauatia’e i totonu o lea faamasinoga o se vaega o auaunaga a Malo Aufaatasi, o latou lagona faasino i le fefaaalia’iga o manatu o atunuu o le lalolagi i le mataupu i suiga o le tau, e pei ona laualuga i fono a atunuu ma faalapotopotoga eseese o le lalolagi.

O Mati o le tausaga nei na fausia ai se finagalo o Malo Aufaatasi e tuuina atu lea mataupu mo se finagalo o lea faamasinoga.

O le aso 2 o le masina nei o Tesema na amata tauaofia ai le faamasinoga faavaomalo e faafofoga i folasaga a atunuu e 96 ma faalapotopotoga tuma’oti e sefulutasi.