O le limamafola o le Iuni a Europa poo le European Union e pei ona augofie lea faalapotopotoga e faatupe polokalame o le atina’e o tina nofotane o loo faagaioia e le Toomaga mo ē Puapuagatia.
Ua faatino i le vaiaso nei se tasi o polokalame e saga siitia ai pea le soifua galulue o tina nofotane o loo auai i le polokalame, ina ia faateleina lo latou tomai e faatino ai atina’e e ala i pisinisi laiti e maua ai a latou seleni e fesoasoani i le tausiga o latou aiga.
Faaalia e le Toomaga mo ē Puapuagatia i se pepa o faamatalaga, e 200 tina nofotane i Upolu sa auai i se tasi o ia faatasiga sa faia i le maota o le Tuiatua Tupua Tamasese Efi i le Aso Lua ma le Aso Lulu o le vaiaso nei, ae faaauau atu mo tina nofotane o le polokalame o loo alala i le motu o Savaii.
Ua faaigoaina lea polokalame o le Nofotane Samoa Social Enterprises Project ma ua lē gata e unaia ai tomai ma silafia o tina o loo auai ae ua aofia ai foi ma tina nofotane e iai o latou aafiaga ma manaoga tumau o le soifua.
E 3 tausaga o lenei poloketi ua amata i le tausaga nei e tau atu i le tausaga e 2026 ma o loo taulai ia maua se toaselau o tina nofotane e fai i latou ma faata’ita’iga poo role models mo isi tina maupaolo.
O le autu o lea vaaiga taulai mo le 3 tausaga o muamua pe a mae’a le poloketi ia mafai lava e tina ona faatino a latou lava atina’e’ e tausi ai le soifua maloloina ma isi fuafuaga i totonu o latou aiga ma le nuu.
O le sini lea pe afai e taunuu ua galulue faatasi ai le Toomaga mo ē Puapuagatia ma le faalapotopotoga o le soifua maloloina o aiga le Samoa Family Health Association ma le auaunaga tuma’oti o le Samoa Spinal Network.
