Ua toe faafou le mafutaga vavalalata a le faalapotopotoga ua ta’ua o le Pacific Horticultural & Agricultural Market Access Plus, e ta’u faapuupuu o le PHAMA Plus ma le Malo, e ala i le Matagaluega o Faatoaga ma Faigafaiva i le faamoemoe e faatutu ni nofoaga e faafailele ai le talo e maua ai tiapula lelei mo le aufaifaatoaga.
O le toe faafou foi o lea faigapaaga ua faailoa ai e le Minisita o lea matagaluega le susuga Laauli Leuatea Polataivao Fosi Schmidt le faameaalofa atu e lea faalapotopotoga e ala mai i le latou faigapaaga ma le malo o Ausetalia ma Niu Sila, o se masini faaonaponei e fana ai le palapala ma aveese iniseti ninii faalafua mai aano o talo, mo le siitia o le tulaga lelei mo le faatauina atu i Niu Sila ma Ausetalia.
E 308 afe tala le tau o lea masini o le a faaaoga i le nofoaga i Savaii o le a tapena ai fua o faatoaga e pei o le talo a o lei aveina i maketi i fafo.
I le toe faafouina o lea faigapaaga a le matagaluega o faatoaga ma faigafaiva ma le PHAMA Plus na faailoa ai e le Minisita le agaga faafetai i le faalapotopotoga ona e le o tuua pea le lagolago atu i le Malo mo le faaleleia ma le siitia o atina’e tau faatoaga i le atunuu.
Aemaise o lea ua talia e le Malo le talosaga mo le faatuina o le pulega e vaaia oloa e faatau i fafo a le atunuu o se tasi o laasaga tāua i taumafaiga e unaia le tulaga lelei o fua tau faatoaga mai Samoa mo maketi i fafo.
Sa auai sui o Malo o Niu Sila ma Ausetalia faapea sui o lea faalapoptopotoga i le sainia o le maliega sa faatino i le Aso Lua o lenei vaiaso i le ofisa o le Minisita o Faatoaga ma Faigafaiva.
