O le tuuina atu ai e le faafaletui o faipule o le vaega faaupufai e puipuia aiā tatau a tagata o se finauga faaletulafono i le faamasinoga, ua lu’i ai le faiga faavae a le faigāmalo a le Faatuatua i le Atua Samoa ua Tasi, i suiga o filifiliga o ta’ita’ifono o Fono Faavae ua fulisia iai le lagolago a itumalo faapalota e 14 o loo tula’i mai ai sui faipule o le itu faaupufai o loo agaia le malo.
O le fonotaga a lea pati faaupufai ma sui lagolago o ia itumalo na molimauina ai i finagalo faaalia le fulisia o manatu e talia le ave o le matāupu i le faamasinoga lea ua mae’a faaulu ma ua tālia nei le valaauga muamua i le masina fou o Mati.
Na faaleo foi nisi o finagalo ua fautuaina ai le ta’ita’i ma lea vaega faaupufai e faia se solo tetee e faamautū atili ai lo latou lē talia o suiga ua faia i le filifiliga o ta’ita’ifono ma sui o komiti o latou Fono Faavae.
