E manatu le aupopoto i tulaga tau le soifua maloloina o le faaiuga a le malo ua faia e le faatulaga ai ni aiaiga mo le agai mai o tagata malaga faavaomalo i le atunuu, o le faaiuga sa’o lea.
Ua faailoa mai ia finagalo a o faatupulaia pea popolega e faatatau i le aofai o tagata e aafia i le koviti o loo agai mai Saina ma popolega foi i le lē lava o faamatalaga o faailoa mai e lea atunuu e uiga i le faamai.
O le faamatalaga a le minisita o feagai ma le mataituina o le Koviti-19, Ayesha Verrall ua ta’ua ai ua mae’a ona faia se iloiloga i tulaga tau le soifua maloloina lautele ma ua iloa ai o loo itiiti ni aafiaga lē lelei o le a iai mo Niu Sila i le mataupu e pei ona faatalanoaina.
E manatu la le toatele o sui sinia ma i latou e silafia ma suesueina mataupu tau faamai i totonu o Iunivesite i le atunuu, o loo lelei le faaiuga o loo tumau ai pea le malo i le lē faia lea o nisi vavao ma aiaiga faaopoopo mo tagata malaga mai Saina.
