O le faalapotopotoga o le siosiomaga o le Pasefika le SPREP o lona ofisa tutotonu o loo i Samoa, ua faailoa lana lagolago malosi i le sailiga o le siamupini o le tuuga vaaalo faavaomalo o le a faia i lo tatou atunuu i le masina nei, e ala i le faalauiloa o le tāua o le tausia o le siosiomaga lelei ma saogalemu.
O le feau tau molimoli a le SPREP o le a faalauiloa i le taimi o lea tuuga vaaalo faavaomalo o le faaitiitia o fagu uga ae faaaogā fagu e ave ai vai e mafai ona toe faaaogā pea e aunoa ma le lafoai ma aafia ai le siosiomaga e le gata i le laueleele ae o le sami.
Ua mafai ona faatino lea faalauiloa tāua i le fesoasoani a le Malo o Ausetalia e silia i le 36 afe tala tupe Ausetalia.
Ua faaalia e le Faatonu o le SPREP o se avanoa lelei le faia mai i Samoa o lea tuuga vaaalo, ua saga faalautele atu ai pea le tala’iga i le lalolagi, ia faamamā le siosiomaga ma faaitiitia le faalapisi i otaota e pei o fagupa’u uga e matuā afaina ai tele le ola saogalemu o meaola o le sami.
E 28 atunuu o le a auai i lea tuuga vaaalo faavaomalo.
