A iai tagata e lē fiafia i le faaiuga a leoleo i le leai o ni mau malolosi e faavae ai ni moliaga e tuuina atu i le faamasinoga, e suesue ai le mafuaaga o le maliu o le atalii o Tuuau i le faalavelave tau taavale na tupu i le tolu tausaga talu ai, o loo avanoa le tulafono e o ai e su leoleo, poo le fai o moliaga e ave i le faamasinoga i le tapenaga faaletulafono ua ta’ua o le private prosecution.
O le finagalo tali lea mai le Minisita o Leoleo, Falepuipui ma le Toe Fuataina le afioga Faualo Harry Schuster, na folasia i le Palemene ina ua fesili le faipule o Faleata 4 le tofa Ale Vena Ale, pe aisea ua lē avea ai le mataupu i le faamasinoga, ae ua iai molimau ma tagata ua masalomia.
O se tasi lenei o mataupu ua tumu ai luga o fesootaiga televavave faaonapo nei le social media i manatu faaalia, ma o le tali a le Minisita o leoleo na faaalia ai e le faipule o Faleata 4, o lea ua ia manino ma ua aogā foi lana fesili ua silafia ai e le atunuu le tulaga ua taoto ai lea mataupu.
O le Minisita o Faatoaga ma Faigafaiva le susuga Laaulialemalietoa Leuatea Polataivao Fosi Schmidt, na maua lona avanoa e saunoa ai i le mataupu lenei ona o ia se tasi o minisita o loo laumanuia ai lona suafa, aemaise o se tasi o faipule ua tuumalo.
Le Minisita o Faatoaga ma Faigafaiva, susuga Laaulialemalietoa Leuatea Polataivao Fosi Schmidt.
