Ua nofo sauni le auaunaga a le ofisa mo le vaega o puipuiga lautele le Biosecurity i le ofisa fā’asu poo le quarantine, e taofia uma oloa tau taumafa tuu’aisa o ni faamomoli poo oloa a kamupani e aumai mai Amerika Samoa, pe afai ae taunuu i le uafu i Matautu i Apia e leai se pemita faataga ma pepa o le puipuiga o le saogalemu mai le matagaluega o faato’aga i Amerika Samoa.
Ua faailoa e le vaega o puipuiga lautele o loo leoina tuaoi o le tatou atunuu i le sao mai o ni faama’i ona o ni oloa e faaulufale mai, ua molimauina le faatupula’ia o uta e aumai mai Tutuila e leai ni pemita faataga ma isi pepa e mana’omia ina ia mautinoa ua saogalemu ia oloa mo le faaulufaleina mai i Samoa.
O Mati o le tausaga nei ua faailoa e le ofisa o le vaega o puipuiga lautele o le a toe amata ona faamalosia ai tulafono o le faaulufaleina mai o oloa tau taumafa tuu’aisa, ma ua sauni le ogaumu se’i tulou e lafoa’i iai ia ituaiga o oloa pe a leai ni pepa ma pemita faataga.
O lona uiga a oo loa ina taofia ni oloa faapea ona o le lē usita’ia o tulafono, o le taunuuga o le lafoa’i loa i le ogaumu ua saunia e faatama’ia ai ni taumafa tuu’aisa e aumaia faasolitulafono.
