E 20 tamai maile na lafoai i fafo o le nofoaga o loo malu ai meaola i Saute o Aukilani.
O le nofoaga lenei i Manukau, Manukau Animal Shelter e pulea e le Auckland Council, ma o lea na faate’ia le aufaigaluega i le alu atu o le taavale tuu atu le pusa ma toe alu ese.
I totonu o lea pusa o loo iai tamai maile pe tusa ma le 6 i le 8 vaiaso le matutua.
Mai le aufaigaluega na mauaina, e faamomoiloto le tele o nei meaola ua lafoai atu, peitai, e ui e lē faigofie ae e sili ai lea na i lo le lafoai i le paka.
Ua lipotia mai ai ua tele ina leai ni avanoa i le nofoaga lenei i Manukau, ma o le toe faaopoopo atu ai o le isi 20 ananafi, ua atili ai.
Ua faaalia ai e se tasi o sui o le Auckland Council, le lē lelei o ē anaina nei taifau ma ua toe faamanatu mai ai o le tali lava o le faafitauli o le faatāua o le faia o taotoga o meaola e le mafai ai ona fanafanau.
