Ua faailoa e le malo o loo latou laasia nei ni laasaga e manaomia ona faatino e tail atu ai i le faateteleina pea o soligatulafono a tupulaga talavou.
O tamaiti e i le va o le 10-13 tausaga le matutua e faaauau pea ona aafia i soligatulafono ogaoga o le a taulai iai nisi o taumafaiga ua faatulaga e le malo e tuuiitiitia pe taofia ai nei tulaga ma o sea faiga o le a faatino lava i totonu o le 24-48 itula talu ona aafia se tamaititi i se faalavelave.
O se vaegatupe e 2 miliona lea ua faailoa o le a faaagaga ane mo lea taumafaiga i vaega e fa o le atunuu e aofia ai Aukilani, Waikato, Northland ma le Bay of Plenty, e agai sao i le faatupeina o nisi o fuafuaga ma polokalame e faaitiitia ai soligatulafono a talavou.
O lea folasaga ua toe faaaopoopo ai i le 53 miliona le paketi a le malo sa faalauiloa ia Setema, ua faaigoaina o le Better Pathways.
O lona uiga la mo sona faapupulaga atili e pei ona faailoa mai i le Newshub afai e iloa ma pue e leoleo se tamaititi solitulafono, o le a faasoa loa ona faamatalaga agai i le Oranga Tamariki i totonu lava o le 24 itula ma se fuafuaga e malilie iai pe faapefea ona faatino ane e lagolago mo lea talavou ma e tatau ona faamautu sea fesoasoani i totonu o le 48 itula talu ona taofia.
Saunoa ai le minisita o Leoleo Chris Hipkins o le faamoemoe ina ia gausia le faatamilosaga lea o soligatulafono ma faaitiitia foi osofaiga o ram raids lea e faaaoga ai taavale e faaleaga ai ma gaoia ai pisinisi.
O le lipoti lata mai a leoleo i le mataupu lea o loo ta’ua ai o le 76 pasene o ram raids sa faatino e talavou e i lalo ifo o le tai 17 tausaga le matutua.
