Ua le manao le taitai o le Itu agai ma le vaega faaupufai o le hrpp e faaulu sana tagi i leoleo, i le tuanai o se gaioiga a se tina matua 79 tausaga o le soifua na ia kola ai le laei o le susuga Tuilaepa L Sailele Malielegaoi, ma motu ai lana faasolo.

O le faamatalaga lea mai le Komesina o leoleo susuga Auapaau Logoitino Filipo, ina ua tapa sona finagalo e faamanino ai le tulaga na tulai mai i le Aso Faraile ua mavae, ina ua mae’a le sauniga lotu faapitoa e talosia ai galuega a le faamasinoga o lenei tausaga, sa auai le taitai o le Itu agai.

Faaalia e le Komesina o leoleo o le tina matua na faia lea gaioiga e faamautu i Amerika, ae na agai i le ofisa o faamasinoga mo sana mataupu i le faamasinoga o fanua ma suafa.

O le mae’a o lana mataupu na agai ane le tina e toe foi, ae ia vaaia ai Tuilaepa i le vaega i luma o le ofisa e ulufale atu ai le atunuu o loo agai i lana taavale. Na savali ane loa le tina matua i le taavale a le taitai o le Itu agai ma la’u iai ni faamatalaga i ni mataupu e le o fiafia iai.

O le tina na faia lea tulaga ma nisi sa iai i le nofoaga na tulai mai ai le gaioiga na ave uma i le ofisa o leoleo mo le faia o faamatalaga, ae na faaalia e le Komesina o leoleo sa agai malu o le malo i le taitai o le Itu agai ma fesiligia pe fai sana tagi ae na tuu ane le fasipepa i leoleo o loo tusia ai lona finagalo, e le manao iai.

O le aliali mai o lea tulaga na tapa ai se finagalo o le Komesina o leoleo pe le toe talafeagai le iai o se malu o le malo e vaaia le saogalemu o le taitai o le Itu agai.

Se finagalo o le Komesina o leoleo susuga Auapaau Logoitino Filipo.