E malie eseese foi le faaiuga o le vaiaso talu ai ma le amataga o lenei vaiaso fou i taaloga amata o le Ipu o le Lalolagi i le lakapi e pei ona maimoaina e le toatele i vaega eseese o le lalolagi.
Amata lē lelei ai le ‘au a le atunuu le All Blacks ina ua faiaina ia Farani i ‘ai e 13-27 o se tasi o faaiuga e lei mafaufauina e le toatele.
O le taaloga a Namibia ma Italia na malo ai Italia 52-8, Aialani ma Romania, malo Aialani 82-8.
O le fetauiga i le Aso Sa a Ausetalia ma Georgia na malo ai Ausetalia 35-15, malo Enelagi i le la taaloga finau ma Argentina, 27-19, faatolilalo e Iapani le ‘au a Chile 42-12, fetauiga i le taeao ananafi na malo ai Aferika ia Sikotilani 18-3 ae lusi ai e Fiti le avanoa e malo ai ia Wales ina ua lē maua le latou sikoa i minute faaiu o le taaloga ma malo ai Wales 32-26.
O le Aso Faraile o muamua e faasolo ai isi taaloga a Pulu lea o le a fetaui ai Niu Sila ma Namibia ma le uluai taaloga a le Manu Samoa e taaalo ai ma Chile i le Aso Toonai o le vaiaso nei.
