E na o le 13 tausaga o si tamaititi lea ua faamaonia mai ua maliu mai ona manu’aga i se afi tele na sasao ane i le faaitu o Western Australia i le vaiaso talu ai.
O le faalavelave lenei na lipotia mai ai o le 13 tausaga lea ma isi tamaiti e toalua e 12 ma le 14 tausaga na manunu’a mai ai i le afi lea i se fale i Mt Tarcoola ma aveina atu ai i le falemai o Tamaiti i Perth mo togafitiga.
Fai mai e tigaina manu’aga o le 13 tausaga lea ae feololo le isi toalua ma se tasi tamaititi e atoa iai le toafā na maua i se fale i autafa ane o le nofoaga na mu, sa faia foi iai togafitiga ma ua toe tea i tua mai le falemai.
Peitai la o lea ua faamaonia mai e leoleo ua maliu lava si tamaititi 13 tausaga lea mai ona manu’aga.
O loo faatalia se faamatalaga auiliili mai leoleo e tusa o le mafuaaga o le afi ae poo iai nisi na aafia e ese mai alii talavou e pei ona faailoa.
