O lipoti o loo tuuina mai e tusa o galuega o loo faatino mo le puipuia o le siosiomaga o le gataifale o le atunuu mai ni aafiaga e mafua i le vaa su’esu’e o le fitafita o le sami o le malo o Niu Sila ua goto i le itu i saute o le motu o Upolu, e leo taga tasi se faamatalaga o loo tuuina mai, mo le faalauaitele atu i le atunuu auā lo latou silafia.

O le  lipoti lata mai o le Aso Gafua o lenei vaiaso ua faailoa ai e itiiti ifo i le lua selau afe lita o suauu ua mama i fafo mai le aofaiga e 900 afe tane o suauu o loo i luga o le vaa.

Pe ana fai ua mama i fafo le 200 afe lita poo le sili atu suauu ua faaalia ile lipoti o le Aso Gafua 14 o Oketopa, e ese ni vaaiga e molimauina. Ua oo atu nei i le 60 tagata o sui o le vaega o le puipuiga o le malo Niusila ua galulue i Samoa talu ona tulai mai le faaletonu ua goto ai le HMSNZ Manwanui e pei ona silia nei ma le vaiaso.

Ua aofia i lea numera o tagata mai le puipuiga a Niu Sila ma nisi o tagata e iai tomai aoaoina i aafiaga o meaola mai ni faalavelave tau i suauu masaa ile sami mai le iunivesite o Massey i Niusila. Ua faailoa foi i lea lipoti lata mai, le tapena ai nei o se laina telefoni e fesootai atu ai le atunuu latou te maua ni meatotino mai le vaa ua goto, ina ia toe faafoi.