Ua ta’utino le ami a Isaraelu e iai mea sese na faatino e ana fitafita i le faalavelave ua maliliu ai tagata faigaluega e to’a 15 o emergency workers i le itu i Saute o Gaza e pei ona lipotia atu i le Aso Faraile talu ai.
O le aumalaga a le Red Cross a Palesitina na aga’i ane i ni taavale a le falema’i faatasi ai ma se taavale a Malo Aufaatasi ma se taavale fuimu mai le vaega o puipuiga faalotoifale a Gaza na osofa’ia i Rafah, sa muamua faailoa e Isaraelu e o atu le aumalaga lea e le kiina moli o taavale ma sa masalomia ai o ni gaioiga e ono aafia ai vaega’au a Isaraelu i lea faaitu peitai ua maua lelei i se video na pu’eina e se tasi o paramedic ua maliu, sa ola molī o taavale na aga’i ane ma sa aga’i ane foi e tali i se valaau mo se fesoasoani i tagata sa faamanu’alia.
Sa ta’ua foi muamua e le vaega o le puipuiga a Isaraelu pe to’a 6 o le aumaliliu e iai sootaga i le Hamas peitai e lē o iai ma ni faamaoniga o lea tulaga.
E to’atasi le paramedic na sao mai ai i lea osofa’iga ma o ia la lea ua faamatalaina uma le mea na tutupu ma faia ai loa su’esu’ega a Malo Aufaatasi.
O le taimi nei ua folafola atu e le vaega o le puipuiga a Isaraelu o le a faia loa sa latou su’esu’ega auiliili i le mataupu ma ua valaau foi le Red Crescent ma isi faalapotopotoga faavaomalo mo le faia o se su’esu’ega tuto’atasi i lenei mataupu ma e fai lava si ogaoga.
