Ua ioe le alii o Amosa Leapai i moliaga e lua o le talepefale ma le gaoi.

O lea alii o loo i lalo lava o le vaavaiga a leoleo i le taimi nei.

E faapea o le aso 26 o Novema o le tausaga ua mavae na ulufale faamalosi ai lenei alii i totonu o le fale o le tamaitai Fomai ia Dr Esmay Ah Leong i Mulivai ma ia toesea mai ai se key o le taavale Hyundai e tusa ma le $150 lona tau, e tasi se laptop e tusa lona tau ma le $4562.20.

O se ipad e tusa lona tau ma le $1216.55, o se telefoni feaveai Galaxy A71 i lona tauaofai e $2000, faatasi ai ma le tinoitupe e $500.

O le aofaiga o meatotino na toesea e lea alii e $8428.75.

O le alii o Amosa o ia lea e toatolu iai alii na o latou talepe foi le fale o le Komesina o Tineimu ia Tanuvasa Petone Mauga i le tausaga ua mavae lea e silia foi i le 16,000 le tau aofai o meatotino sa gaoia.

Ua tuuina atu nei le faasalaga o lea alii e toalaulau i le aso 6 o Mati o le tausaga nei.