Ua lipotia le ioeina e Pope Francis o patele ina ia faapaia ulugalii itupa tutusa ma ua iai ma se pepa o faamatala ai suiga i le Vatikano ma ana faiga faavae ua maumaua’i ai o tagata o loo fia sailia le alofa ma le agalelei o le Atua e lē tatau ona tuuina i se tulaga e matua’i suesueina auiliili ai ina ia o latou mauaina (pe a tuu i se faasamoa lata mai o le exhaustive moral analysis).
O faamatalaga ia mai le lipoti a le One News i le asō ua faailoa o le pepa mai le ofisa o le Vatikano na faalauiloa mai i le po anapo, ua toe faamautu ane ai o le faaipoipoga o se sakalameta umi i le va o le alii ma le tamaitai, ae o loo ta’ua ai foi o ni talosaga mo tulaga faapea mo ulugalii itupa tutusa e lē tatau foi ona taofia.
E eseese finagalo ma lagona o nisi o loo faailoa i upega tafailagi i le mataupu lenei, faailoa le lē fiafia o nisi o sui o le ekalesia ae toatele foi i latou ua faailoa le fiafia i le faaiuga ua faailoa mai e le faauluuluga o le ekalesia.
