Ua mafai nei ona faailoa mai, o le tagata lona lua lea e sootaga i le fasiotia o se alii faipisinisi Aukilani, sa nofosala i lona aiga pe home detention i le taimi na ia faatino ai lenei faalavelave.
O le alii talavou o Joseph Patolo, e toe lua vaiaso atoa lona 21 tausaga, sa faatulaga o le masina o Me o le a tula’i ai i luma o le faamasinoga mo lona moliaga o le fasioti tagata faamoemoeina, peita’i o le taeao analeila na na toe foi ai Patolo i le Faamasinoga Maualuga i Aukilani e tali na te ioeina le moliaga o le fasioti tagata pa’ivalea ma le moliaga o le gaoi ma le faomea i se tulaga matuiā.
Ua tula’i lea alii i luma o Justice Graham Lang, ae faato’ā 11 aso talu foi ona faia e lē na auauai i le faatinoina o lenei solitulafono, le tama’ita’i o Amy Joy Parker, e 24 tausaga le matua, se maliega o le a ioe i le moliaga o le fasioti tagata pa’ivalea ae ia toe faaui i tua le moliaga a leoleo o le fasioti tagata faamoemoeina.
E iai le tagata lona tolu na aofia i le faatinoga o lenei soligatulafono ma o loo tumau pea lona moliaga o le fasioti tagata faamoemoeina, ma o loo faatulaga pea lona faamasinoga i le masina o Me.
I faamaumauga o lenei faamasinoga o loo ta’ua ai, o Paloto ma Parker e tuaoi o la fale, ma sa taufai faamau uma a la tauvae e māta’itū ai e leoleo a la gaioiga a o nofosala i o la aiga mai nisi foi soligatulafono sa aafia ai, a o la tulimata’ia ai le osofa’ia o Ahmed Al-Obaidy ia Oketopa i le 2024.
I ni masina muamua atu a o le’i maua le tino maliu o lea alii i le ogatotonu o le Pt England Rd, i manu’aga sa tatui se’i tulou ma toe soli e lana ia lava taavale, o loo ta’ua faapea sa faia ni fesoota’iga a Al-Obaidy ma le tama’ita’i o Parker i luga o le social media.
Na fai le la fuafuaga e feiloa’i atu lea alii ia Parker i le po lena mo le faatinoga o ni feusua’iga ae faafesuia’i i tupe, ‘avamalosi ma tapaa.
O nisi o auiliiliga o lenei faalavelave e lē o matuā faailoaina, ae mo Patolo ma Parker lea ua ioeina o la moliaga o le fasioti tagata pa’ivalea, ua faatulaga e lau faatasi o la faasalaga, e ui o lea e le’i faamautinoa maia le aso tonu o le a valaau ai lo la faamasinoga.
O loo taofia pea i la’ua uma i le vaavaaiga a leoleo.
Puna o Faamatalaga: https://www.nzherald.co.nz/nz/crime/pt-england-death-joseph-patolo-pleads-guilty-to-manslaughter-of-auckland-businessman-ahmed-al-obaidy/ECQBN5PKGNGIHAYQN46GPA2TG4/
