Ua faaauau ona nofo taofia pea i le falepuipui i Tanumalala i le vaaiga a leoleo se tinā talavou 23 tausaga le matua, e faatali ai le aso 18 o le masina nei e lau ai se faai’uga a le faamasinoga i moliaga e lua ua ia ioeina, o le umia lea o le ituaiga o nakoti o le ‘aisa poo le methamphetamine.
O Sophia Ah Mann poo Sophia Ikenasio Ah Mann na alu e asi lona to’alua o loo tuli le faasalaga faafalepuipui i Tanumalala i solitulafono o le umia o le ‘aisa.
Ina ua taunuu i le falepuipui sa faia siaki a leoleo o le toese ma maua ai i le laei o le tinā ni tagapepa iila se lua o iai totonu le pauta faasāina o le ‘aisa e tusa le mamafa ma le 0.70 kalama.
Na su’esu’e foi lana taavale na malaga atu ai ma maua ai isi tagapepa iila e lua o loo iai le ‘aisa e tusa le mamafa ma le 0.04 kalama.
O le masina na te’a nei o Novema i le aso 23 le Aso Toonai lea, na alu ai le tinā e asi lona to’alua ae maua ai o ia umia ia pauta faasāina, ma sa taofia ai loa se’ia oo mai i le Aso Gafua o le vaiaso nei lea na tula’i ai ma tuuina atu lana ioega i moliaga e lua.
O faamaumauga a leoleo o loo faailoa ai o le tinā ua molia e mai Vaivase Uta ma Lufilufi.
