O le aso 6 o le masina fou o Iuni o le a tuuina atu ai folasaga a loia a leoleo ma loia o loo tula’i mo Mikaele Halafihi o se tagatanuu o Tonga, ma se lipoti a le ofisa faanofo vaavaaia e fuafua iai se faasalaga mo lē ua molia.

O lē ua molia ua na ioeina moliaga e tolu o solitulafono o le faia o ni fesoota’iga tau faiaiga ma le faaoolima matagā i se teineititi e i lalo o le 16 tausaga le matua.

Sa galue Mikaele Halafihi poo Mikaele Paea He Lotu Mateo, o se tasi o pailate o le kamupani vaalele o le Talofa Airways i le taimi na tula’i mai ai le solitulafono i Vailele i le masina o Setema o le tausaga na te’a nei.

O lē na aafia e pei ona faailoa i faamaumauga a leoleo e 15 tausaga le matua, o se tagatānuu o Tonga ma Niu Sila.

Sa tetee lē ua molia i le moliaga o le toso teine poo le rape ae ua talia e le faamasinoga le talosaga a leoleo e faaui i tua ae suia i moliaga e tolu ua ioe iai Mikaele.

O loo faaauau ona tatala o ia i tua i aiaiga e faatali ai Ie aso ua tolopo iai lona faamasinoga mo se iloiloga o se faasalaga.