Ua ioe Sani Andrew poo Sani Lino Crichton i moliaga e 10 o moliaga e 11 o loo faasaga ia te ia.
E aofia ai i ia moliaga le moliaga e tasi o le sola ese mai le vaaiga a leoleo a o tālia le valaauga o lana mataupu i le faamasinoga.
O moliaga o loo faasaga atu i lea alii e 11 le aofai e aofia ai le talepe fale ma le gaoi,faapea le umiaina o fualaau faasāina o le mariuana ma paipa e ula ai mariuana.
E oo lava foi i le taimi sa taofia ai le vaaiga a le Falepuipui i Tanumalala sa maua ai foi sikaleti o le mariuana.
O soligatulafono a lea alii na amata mai i le tausaga 2022.
Sa ioeina e lea alii moliaga e 10 ae o le moliaga o lona tuuina o ni faamatalaga taufaasese i leoleo ia Me o le tausaga 2022 i luma o le Maota o le Faalapotopotoga o Taui o Faalavelave Faafuasei na faaui i tua e le itu a leoleo ina ua ia ioeina isi moliaga e 10.
O loo nofo taofia nei lea alii e faatali ai le lauina o se faaiuga a le Faamaisnoga ia te ia i le aso 10 o Aperila, o le tausaga nei i luma o le Tamaitai Faamasino ia Niava Mata Tuatagaloa.
