Ua ioeina e se alii leoleo e 22 tausaga ona moliaga i le faalavelave na maliu ai se tagata tietie uila i East Auckland i le masina na tea nei.
Ua lipotia e le One News o Jada Manase sa ia ioeina lona moliaga o le avetaavale faatamala i le faamasinoga faaitumalo i Manukau.
O lē ua maliu o David Lane e 69 tausaga o le soifua na lavea i Stancombe Rd i Flat Bush i le tea o le 8 i le taeao o le Aso Toonai 17 o Setema.
I le faamasinoga i le aso ua lipotia na faailoa ai e le loia a Manase ua mae’a ona tuuina atu faatoesega tusitusia i le aiga o lē ua maliu ma ua taliaina foi. Ua faatulaga o le masina o Ianuari o le tausaga fou o le a lauina ai le iuga o lea mataupu.
