E lua tausaga ma le 4 masina le faasalaga i le falepuipui o Shon Faamasino sa ioe i moliaga o le lima tagoese a o avea ma tagata faigaluega a le kamupani gaosi sikaleti o le British American Tobacco i Vaitele.
E $29,639.16 sene se tinoitupe na aafia i le solitulafono ma o seleni mai le faatauina atu i faleoloa o katuni sikaleti mai lea kamupani.
O lē ua nofosala o se tasi sa galue i le tilivaina o ia oloa tau tapaa ma o lana tiliva sa tautuaina faleoloa uma i le talafatai i Sisifo o le motu o Upolu.
O le masina o Me o le tausaga e 2014 na tupu ai le solitulafono ina ua lē tausisia e Shon le aiaiga a mae’a le tiliva ona foi lea i le ofisa e siaki ana oloa o totoe ma ave seleni o le faatau.
Na siaki e se isi tagata faigaluega lana tiliva ma iloa ai le faaletonu.
O le tupe na toesea i le solitulafono na faaaogā e lē ua nofosala i le toese, e totogi ai ni ana nonogatupe ma faafou ai lo latou fale.
