Ua lata ina mae’a le masina muamua o le faasalaga 13 masina ua faasala ai i le falepuipui se alii 39 tausaga ina ua faamaonia lona ioe i le solitulafono o le fasioti tagata pa’ivalea.

O le faasalaga maualuga o le moliaga lenei pe a faamaonia o le soloatoa i le falepuipui, peitai ua faaalia i le faaiuga o le moliaga o Talaitau Niue o Satitoa, e eseese mataupu faapenei ma mafuaaga ma e le o taga tasi ai se faaiuga i se faasalaga, pe ua faataoto foi se alāfua i nisi moliaga tau fasioti tagata pa’ivalea ua mae’a suesueina e fua iai ni faasalaga mo tagata e faamaonia lo latou solia o lea solitulafono.

O lē na maliu i le gaioiga a Talaitau na amatamea i lona faaoolima i lē ua molia lea na faaalia e leoleo na ia tu’i le fatafata, ae na tali iai lē na molia i lona tu’iina ma palasi ai i luga o le auala ta, ma toe polili atu i se isi faaoogalima. O lē ua maliu ma lē ua molia o i laua uma e mai Satitoa.

E ogaoga manu’a o lē na aafia ma ua fano le soifua, e le gata ina toulu nisi o ona oloa poo nifo, ae na matua afaina lona auvae, faapea lona alafau ma fufula ma le laulaufaiva na faamanu’alia.

E tele itu lelei o lē ua faasalaina na silasila iai le faamasinoga i lana faaiuga, o lona ioeina o le moliaga, faia o le Ifoga i le sa’o ma le aiga o lē ua maliu, ae na togisala foi iai le nuu ma sa faatino lea faasalaga e tusa o tu ma aganuu a Samoa i totonu o pulega faalenuu.

Faaopoopo iai ma tautinoga lelei mai lana faifeau ma le pulenuu na amata ai le fua o le faasalaga i le 4 tausaga, ae teena le valu tausaga na finauina e loia a leoleo.

O le aofaiga atoa o masina o le fā tausaga na amata ai le fua ua aveesea ona o itu lelei, totoe ai le 13 masina ua avea ma faasalaga faafalepuipui.