Fai mai o loo iloilo nei e le Mana Whenua nisi faasāsāga e faia i le Abbey Caves lea na tupu ai le faalavelave i le Aso Lua o le vaiaso nei na maliu ai se tama aoga 15 tausaga.
O Karnin Petera le tama aoga o le Whangarei Boys High lea ua maliu i le malaga a le latou aoga na agai ane i le nofoaga lea ma faatoa maua lona tinomaliu i se taimi mulimuli ane o le aso lava lea sa tetele ai timuga ma faaletonu ai le tau.
O le Aso Tofi na agai ane ai sui o le Ngati Kahu o Torongare ma faailoa o le a tapunia le nofoaga mo le masina atoa ma faasā ai ona toe ulufale iai se tasi faapea foi i faigafaiva ma nisi gaioiga sa masani ona faatino i lea nofoaga.
Fai mai le Stuff e ui o le fanua o loo iai i luga le nofoaga lea e umia e le Council a Whangarei ae o le hapu lea e iai ana aiātatau i le nofoaga.
O loo faia nei se suesuega pe alagatatau ona faia nisi sā faaopoopo i le nofoaga i le taimi nei.
