O se vaatau a Iapani ua aga’i atu nei mo Amerika ina ia faapipii iai meatau fana mamao, tomahawk cruise missiles, o le gaioiga aupito lata mai lea a Uosigitone ma ana paaga i le Atu Asia e faaopoopo ai o latou malosi’aga a o faalautele foi tulaga ia e isi atunuu e pei o Saina ma Korea i Mātū.
Lipotia e le CNN o le vaatau la lea a Iapani o le a faia iai ni suiga i Amerika e ala i le faapipii iai o meatau faaopoopo ia e pei ona ta’ua faapea ma le faia o toleniga a le auvaa ina ia mafai ona o latou faafoeina ‘au’upega o le a faapipiiina.
O le amataga o le 2024 na sainia ai se maliega i le va o Iapani ma Amerika ina ia maua ane ‘au’upega ia o tomahawks ina ia faaopoopo ai le puipuiga mo Tokyo.
Faailoa la e le matāgaluega o le puipuiga a Iapani ua faia lea faatatau ina ia mafai ona o latou faamuta ma faalavelavegia ni malosi’aga e faasagatau ane ia Iapani i se taimi vave aemaise foi ia faia i se tulaga mamao a o le’i taitai oo ane i le atunuu.
Puna o Faamatalaga: https://edition.cnn.com/2025/10/01/asia/japan-warship-tomahawk-missiles-intl-hnk-ml
