O le aso 16 o le masina nei seia paia le Aso Sa na se’i mavae atu nei, lea na faagasaolo ai le faamoemoe a le Soifua Maloloina e ala i le faainuga fualaau e aofia ai le atunuu atoa auā le puipuia ai mai le faama’i o le mūmū tutupa.

I se tala lata mai i le Matagaluega e tusa ai o lenei faamoemoe na saunoa ai le Pule Sili Lagolago ia Tagaloa Dr Robert Thomsen i le aofaiga o le mamalu o le atunuu na mae’a inumia fualaau.

“O le target population 215000 le aofai atoa o tagata pei ona lesitalaina i le 2020 ae o loo fetuunai pea le matagaluega e pei ona mae’a ai le tusigaigoa i le 2021.

“E pei ona iai le faamoemoe i Savaii lea lava ua taoto lava i falemai faaitumalo latou te faatinoa polokalame o le faainuga fualaau e fuafua i le faitau aofai o loo silasila ai le Matagaluega.

“E mae’a le faainuga fualaau mai le aso ananafi na amatalia ai seia oo mai i le faaiuga o le vaiaso ua silia ma le 160,000 ua oo ai le auaunaga a le Matagaluega ma faatalatalanoa, ae mai lea fuainumera e 145,540 i latou ua taliaina ma inumia nei fualaau.”

E pei ona faailoa e Tagaloa e 90 pasene o i latou i le Motu tele i Salafai ua mae’a ona faatino lenei vaega ae mo Upolu ua ausia le 72 pasene.

“Mo Savaii ua mae’a lipotia i le Matagaluega ua mae’a le auaunaga i le falemai faaitumalo i afioaga o Safotu ma Sataua ae o loo tau faaamae’a mai le falemai i Tuasivi ma Satupaitea.

“Mo Upolu ua ausia e nisi o falemai i itumalo le faatautaia o lenei auaunaga ae peitai o loo taumafai nisi o nofoaga e aofia ai le falemai tele i Motootua faapea ai ma Leulumoega ina ia mae’a ona faatino ai lenei vaega.”

O le tulaga o loo taoto ai lenei faamoemoe i le taimi nei e pei ona faailoa e le Pule Sili Lagolago a le Matagaluega o Soifua Maloloina Tagaloa Dr. Robert Thomsen o loo sologa lelei lava le faatinoina o lenei foi faameomoe tāua i le atunuu.

“O loo taumafai le matagaluega e aoao uma mai faamaumauga i aso taitasi e tuufaatasia lea auā le nofo silafia e le mamalu o le atunuu.

“O nisi o vaega o loo galulue pea le Matagaluega e mataitu tulaga o tatou fualaau e eseese uma le react o tagata i fualaau ma ‘oa fualaau uma ia e leai ni vaega foi ia e iai ona aafiaga poo faafitauli i le mae’a ai ona inumia nei fualaau se’i vagana ai tamaiti i lalo ifo le lua tausaga ma i latou e allergic i soo se fualaau o fualaau ia e tolu e faaaogā i le faainuga fualaau o le mūmū tutupa.

“I le mae’a ai o  suesuega i le 2019 na fuafua ai le faatinoina o le faainuga fualaau ia Aokuso o le tausaga lava lea ae peitai ona o le pepesi ai o le faamai o le misela lea sa taofia ai.

“Sa toe faatino foi lea o le isi suesuega i le amataga o le tausaga nei ae lei faatinoina le faamoemoe lenei ma maitau ai e le o alu i lalo le fuainumera o i latou o loo maua i le anufe lea e afua ai ona maua i le mūmū tutupa o loo faapea ona faatupulaia pea.”

Pe ā ma le 15 pasene le aofai o i latou o loo maua i lenei faama’i ma le faamoemoe ia ausia le 90 pasene o le atunuu atoa e mae’a inuina fualaau auā le malupuipuia mai i lenei faama’i.

“O o tatou atunuu tuaoi lea ua ausia lea sini autu o le aveesea o lenei faama’i mai o latou laufanua.”

I le fuafuaga o lenei faamoemoe e tasi le vaiaso sa faataatia ai ae o loo tatala pea le avanoa ia i latou e lei mafai ona maua le avanoa aemaise lava ia i latou o loo faigaluega pe le o maua atu i maota ma laoa ma e faaauauina lenei vaega i le masina lenei seia paia Oketopa i lona faaiuga.