Ua faamanino e le alii sui Palemia o Niu Sila, Vaovasamanaia Winston Peters tulaga o le NZ First i le tulafono taufaaofi o le toe faafoi o le sitiseni a tagata Samoa lea na aveese e le faigamalo a Muldoon i le tausaga 1982.
I le faatalatalanoaga a le Radio Samoa ma le afioga i le sui Palemia na fesiligia ai lana afioga e tusa ai ma taumafaiga a Samoa i lea mataupu tāua.
Tali Vaovasamanaia, o se mataupu e ao ona silasila toto’a iai ma iloilo poo fea o loo agai iai manatu ma lagona o tagata o loo i Samoa ma Aotearoa nei aemaise o lagona o ta’ita’i o Samoa sa iai i lea vaitau.
Faailo foi lona naunau e talanoa atu i minisita ma faipule o le atunuu, ina ia maua tonu o fea e mafuli iai lagona mo lea tulafono taufaaofi.
Tali foi le alii sui Palemia, mo NZ First lava ia, o le a o latou iloilo uma talosaga tuufofoga (oral submission), o talosaga tusitusia, tāpā finagalo o ta’ita’i e pei ona ia ta’ua ai le talanoa atu i le tamaitai Palemia ia Fiame Dr Naomi Mataafa, ma minisita ma faipule uma o vaega faaupufai; ae faapena foi ona tilotilo i le poo ā vaega o le a aofia i lalo o lea pili.
Ina ua fesiligia foi Vaovasamanaia i itu tau aiātatau e pei ona malosi ai Niu Sila i ana galuega faatino ma leotele ai i atunuu tetele e pei ona faaalia ai manatu i le tele o faafitauli o loo tutupu i le lalolagi, pei o Hong Kong ma nisi, pe lē saga faamausalī ai la le tulai ma le finagalo a Aotearoa i ia vaaiga pe a talia le toe faafoi mai o sitiseni a tagata Samoa na aveesea?
Tali Vaovasamanaia, o lona lava tilotilo ia faia e Niu Sila le mea sa’o.
O le fesili o le ā le mea sa’o? A tonu o le a maua le faamaninoga o le mea sa’o pe a mae’a iloiloga o loo faatino o le tulafono taufaaofi a le faipule o Teanau Tuiono mo le toe faafoi mai o le sitiseni o tagata Samoa na toe aveesea e Niu Sila i lana tulafono o le 1982.
