O taeao i le Aso Sa, 22 Ianuari o le a faamautu atoatoa ai le tofiga o le alii faipule, o ia foi o le minisita o Aoga ma le matagaluega o Leoleo, Chris Hipkins pe a oo ina tauaofia le vaega faaupufai a le Labor e fai le latou palota e faamaonia ai pe ua latou talia atoa le avea o Hipkins ma o latou taitai a le vaega faaupufai ae o le Palemia e faaauauina le tofiga tāua o le atunuu seia oo i le faigapalota tele o le a sauni atu i iai ia Setema o le tausaga lenei.
O le taeao nei lea na sau ai i tua lipoti a le 1News ma faaalia ai, e na o Hipkins lava lea na sii lona aao e na te fia tauaveina le tofiga taitai o le patī, e suitulaga ai i le tamaitai Palemia o Jacinda Ardern, talu mai lana faasilasilaga na matuā faate’ia ai le atunuu ae tainane le lalolagi atoa, ina ua filifili e faaseetuagalu mai lona tofi Palemia o le atunuu faapea foi le taitai o le vaega faaupufai a le Labor.
Ma afai o le a lagolagoina atoa e le faafaletui a le Labor le tofiga taitai mo Chris Hipkins, e foliga mai foi la o ia o le a see ane loa e faaauau le tofiga Palemia, ma avea ai ma Palemia lona 41 mo le faigamalo a Niu Sila.
Sa iai le faitauga a nisi o le atunuu i le alii sui Palemia, Hon Grant Robertson e see ane i le tofi Palemia ina ua faamavae Ardern, peitai ua uma ona faailoa e Robertson e le o iai sona naunau e na te fia tauaveina le tofi Palemia.
E iai foi isi sui sinia o le vaega faaupufai na tau mafaufau i ai le toatele e ono agavaa mo le tofiga, peitai o le sau o le tala i le taeao nei, e na o Hipkins lava lea na sii lona aao mo le tofiga, ae o taeao pe a fono le faafaletui ona faamautinoa ai lea o le tofiga taitai faapea foi le tofiga Palemia, pe a o le a tauave ai loa e Chris Himpkins.
