E le na o laisene avetaavale ma tusifolau lea ua oo i le gaoi ua liki ai i tua faamaumauga a le Latitude Financial, o lea foi ua alu ai ma faamaumauga o teugatupe.
O le gaoi tele lenei mai le masina o Mati ua liki ai i tua le silia ma le 1 miliona faamaumauga o laisene avetaavale o tagata Niu Sila faapea ai ma le 34,000 tusifolau.
O ananafi na faatoa toe sau ai ma le isi tala e faamaonia ai e tusa ma le 90,000 paaga a le Latitude i Niu Sila ua alu ai ma numera o teugatupe faapea tupe maua ma tupe faaalu sa faaaoga pe tuuina atu mo le faagaioia o talosaga.
Ua o se popolega tele lea e pei ona toe molimau se tasi o loia ma e tatau i tagata taitoatasi ua aafia ona toe mafaufau lelei i le tele o le aafiaga poo le lamatia ua iai nei.
O le tala a le Latitude Financial o loo tuuina mai pea, o lea o loo latou faafesootaia tagata Niu Sila ua aafia, peitai i luga o le social media o loo tuufesili pea le toatele ona o lea lava e leai ni fesootaiga ua maua ae pe faafefea foi ona faamaonia le aafia ma le lē aafia.
Ae mai le ofisa o le Privacy Commissioner o le gaoi tele lenei i le talafaasolopito o Niu Sila ua gaoia ai faamaumauga o tagata ma o loo unaia pea paaga a le Latitude e faaoo atu finagalo pe a talitonu ua ono lamatia.
