O le faaitu lea o Western Sydney poo le itu i Sisifo o Sini ua o latou faia se taumafaiga e faaaogā ai le taaloga o le soka ma nisi o taumafaiga ina ia faaleleia ai le soifua maloloina o tamaitai Pasefika.
Fai mai le ABC o le Pacific Fives o se tauvaga a tamaitai ua faia faatasi ma nisi o taumafaiga a le komiuniti e aofia ai faleaiga ma nisi o auaunaga tau le soifua maloloina.
O le Pacific Cast le isi faalapotpotoga o loo lagolago i lea taumafaiga ma faailoa ai e le sui faavae o le faalapotopotoga, Julius Tuigamala o le faatāua e ave i le matafaioi a tamaitai i aiga o le Pasefika.
E lē gata ina faamalosia le soifua maloloina o le tina poo le tamaitai Pasefika ae ia faaaogā lo latou malosiaga e faalauiloa ai tulaga tau le soifua maoloina i le Pasefika lautele.
O le taumafaiga o loo galulue faatasi ai le Pacific Cast, Sydney Wanderers Football Club ma le NSW Health atoa ai ma le faalauiloa o le Kanesa o le susu.
O se taumafaiga ua faailoa e le toatele o se faiga lelei tele mo le unaia o le soifua maloloina e lē gata i tamaitai ae o tagata uma foi.
