O le fesoasoani a le faalapotopotoga o le UNICEF i le Pasefika ua mafai ai e le faalapotopotoga o le Toomaga mo ē Puapuagatia ona faia a latou polokalame i nuu ma afioaga e tetee atu ai i le sauaina o fanauiti.
O le susuga i le faafeagaiga o le Ekalesia EFKS i Fagalii o se tasi o loo malosi lana lagolago i le polokalame a le Toomaga i totonu o le afioaga, i le faamoemoe autu e tafiesea sauaga o loo aafia ai le ola tuputupu a’e o fanau aemaise o tina ma tamaitai ma fanau teine laiti.
Ua mae’a le polokalame sa faatautaia i le afioaga o Fagalii ae o se taumafaiga ua talitonu le faafeagaiga le susuga Petaia Leavai, a tutu faatasi matua ma aiga faapea tagata o le nuu e lagolago, o le a manuia lona taunuuga.
Faaalia e le faifeau i se pepa o faamatalaga mai le Toomaga, o le suiga o mafaufauga o tagata i le tali atu i faafitauli tau i sauaga, e iai le taimi e suia ai, ae o le sini autu o le ausia o lea tulaga o le galulue faatasi o tagata uma.
O le amata mai le lotoifale o le aiga ona faatupu ai ni suiga lelei o le manulauti lea o loo naunau le polokalame ia ausia.
