Ua sainia le maliega a le Ofisa o Polokalame o le Siosiomaga a le Pasefika poo le Secretariat of the Pacific Regional Evironmental Programme (S.P.R.E.P.) ma le Malo o le Atu Solomona e unaia ai le lagolago i le puipuia o le siosiomaga i taimi o le a faagasolo ai Taaloga o le Pasefika lea o le a talimalo ai ia Novema o le tausaga nei.

O lenei maliega na faasalalau faalauaitele e le S.P.R.E.P. i lana upega o faamatalaga na saini aao ai le Faatonu Sili o le ofisa Sefanaia Nawadra ma le Failautusi Tumau a le Matagaluega o Siosiomaga a le Malo o Tonga ia Melchior Mataki a o auai faatasi i le fonotaga a ofisa o vaaitau a le Pasefika i Fiti.

O lenei manulauti sa faatino foi a o talimalo ai Samoa i taaloga a le Pasefika i le 2019 ma o lea ua faagasolo atu lenei feau tāua i le Atu Solomona.

Na saunoa Nawadra o loo amanaia e le ofisa taumafaiga a le Malo o le Atu Solomona ma ona tagatanuu i tapenapenaga aemaise ai o le lagolagoina o lenei feau tāua e faailoa ai le faafitauli o loo matele ai o le faalapisi i nofoaga faitele ae le gata i lea o le faamanatu i atunuu uma o le Pasefika o le a auai ai i lenei faamoemoe.

“O le fiafiaga e galulue faatasi ma le Malo o le Atu Solomona ma le Pasefika ina ia ave lenei fesoasoani ma se tasi o itu tāua ma vaega manuia o le taligamalo a le atunuu i taaloga o le Pasefika.

“Sa amatalia lenei fesoasoani i taaloga a le Pasefika lea sa faia i Samoa ma ou te tautino atu o se vaaiga manuia lea vaitau i le lagolago ma le utagia e tagata o le feau o loo molimoli atu ai i lenei fesoasoani.

“O le naunautaiga ia mafai ona oo ia tatou fanau lenei galuega tāua mo se siosiomaga saogalemu ma soifua maloloina ona tagata.”

O loo faatupeina e le Malo o Ausetalia lenei fesoasoani e tusa lea ma le $800,000 tala Solomona ae o loo feagai le S.P.R.E.P. ma le faatinoina.

E silia ma le 5,000 sui taaalo aemaise ai faiaoga ma le aufaigaluega lagolago mai le 24 atunuu o le Pasefika o le a auai i lenei faamoemoe.