Ua galulue faatasi nei le Matagaluega o Leoleo ma Falepuipui ma le Ola Toe Fuata’ina ma le kamupani o le Samoa Stationeries and Books poo le SSAB, e faaofi se fesoasoani e faaaogā ai tomai o le vaneina o ata i laau ma tusiaata, mo le toe fuata’ina o olaga o le au nofosala o loo tuli faasalaga i le to’ese i Tanumalala.
O se sao lenei o loo fesoasoani ai ma le Ofisa o le Malo o Peretania i Samoa e faatupe e pei ona faalauiloa i le faai’uga o le vaiaso na te’a nei. O le talitonuga o le Komesina ma le matagaluega o leoleo ma falepuipui, o se isi lea o faitoto’a tāua tele e faailoa ai lagona o le au nofosala i le faaaogāina o o latou tomai i le tusia o ata ma le vaneina lea o ata i la’au.
O le faalauiloaina o le polokalame lenei i le Aso Faraile ua mavae, na faia ai ma se foai e le kamupani o le SSAB o Tusi Paia e 200 mo le falepuipui i Tanumalala.
O le faamoemoe o le tamaitai pule ma le kamupani ia ogatasi le polokalame ma le ola faaleagaga o pagota ia toe fuata’ina ai le olaga, ma mafai ai ona fulitua i faaletonu na mafua ai ona soli le tulafono.
