Ua iai le fuafuaga o le faaopoopo o itula faigaluega atoa ai ma le faaoo atu o leoleoga a le vaega o loo laveaiina mai tagata mai le sami e le o iai i le taimi nei i Aukilani, e amata mai i le faaiuga o le tausaga nei.
O le vaai mamao lea a matafaga e iva i Aukilani a o sau ai le tele o lipoti o tagata malelemo ma maliliu i le sami i le taumafanafana o loo tatou iai nei.
O se fuafuaga o loo faalagolago i le ioe mai o le Auckland Council e faaopoopo le isi $455,000 e faatupe ai, e ese mai le $1.4 miliona o loo mauaina i le taimi nei.
O le faaopoopo o itula e iai tagata laveai nei i matafaga o se faiga ia fetaui ma le toatele e faatuai ona o atu mo taelega.
I le lipoti o loo talosaga mai ai le Surf Lifesaving Northern Region agai i le Auckland Council mo se tupe faaopoopo o loo ta’ua ai le matuai pisi tele o la latou foi auaunaga.
