O le valu masina o loo totoe o le tausaga faaletupe 2025 i le tausaga 2026 ua taoto mai ai le fuafuaga o galuega a le malo mo le atina’e manuia o le atunuu e pei ona folasia i le tala faatatau autū o le tupe, e faaaluina ai se aofa’iga e tasi tesimale 24 piliona ($1.24 billion) tālā Samoa.
O se ulua’i taimi lenei i fuafuaga tau tupe a le malo ua oo ai i se fuainumela maualuga faapea ana tupe faaalu.
E māfua ona o le tulaga lelei o loo iai le tamaoaiga o le atunuu i tupe maua, e fua lea i tulaga maaleale sa iai le tamaoaiga o Samoa i le tuanai o le faama’i Koviti-19.
I le aofa’iga e 1 tesimale 24 piliona o le a faaalu i le tala faatatau autū o le tupe ua i luma nei o le Palemene mo le soalaupuleina e sui usufono o le paea’iga 18 o le fono aoao faitulafono a Samoa, ua faaalia e le Minisita o Tupe le afioga Mulipola Anarosa Ale-Molioo o lea aofa’iga tuufaatasi o tupe faaalu ua aofia ai ma le 7 pasene o tupe faatatauina mo poloketi o le a faatupe mai e pa’aga mo atina’e o le tamaoaiga o le atunuu.
E ese mai i fuafuaga o le atina’e o le tamaoaiga ua fuafuaina e le malo o le a siitia tupe faaalu mo le auina atu o gasegase mo togafitiga i atunuu mamao, lea sa 6 miliona e faaalu ai i le tausaga peita’i ua faaluaina lea fuainumela ma fuafua ai le vaegatupe e 12 miliona tālā.
O le tasi lea o faamuamua a le malo o le itu i le soifua mālōlōina o le atunuu e ala i lea polokalame o gasegase e togafiti i Niu Sila ma Initia.
Peitai o loo taoto nei mai le faigāmalo talu ai le tasi o fuafuaga mo le faatupeina o gasegase e ave i fafo e pei ona iai se fuafuaga e faatupe i se polokalame tau togafitiga poo se medical scheme mai saofaga o loo totogi e tagata faigaluega i le NPF.
O loo taoto nei lea fuafuaga i se finagalo o le faigāmalo fou ua iai nei.
