O le masina o Iulai o le tausaga nei e amata ai le isi tausaga faaletupe fou, ma o le a amata faamamalu ai ma le aoina o tupe mai auaunaga tuma’oti mo galuega faavaitaimi i Ausetalia ma Niu Sila.
Na faailoa e le Minisita o Tupe i le faataatiaina o le tala autu o tupe ua taoto nei i le Palemene, o ni tupe faaopoopo lelei i seleni maua a le Malo e ese mai tupe o lafoga totogi.
O le faiga faavae mo galuega faavaitaimi e pei ona mae’a pasia e le Kapeneta ua aiaia ai le totogi e auaunaga tuma’oti o loo latou sailia tagata faigaluega mo galuega faavaitaimi o se tupe e tusa ma le 10 afe tala o le lesitala i le tausaga, ae o itumalo faapalota o le a latou talia le auai i le filifilia ma le sailia o tagata faigaluega mo galuega faavaitaimi e totogi le lesitala e tasi le afe tala i le tausaga.
O se aiaiga fou lea ua faia e le faigamalo ua iai nei, e auala mai i faiga faavae ua faataoto e faatonutonu lelei ai, le faagasologa o auaunaga eseese mo le sailia o nisi e ave iai ia avanoa faigaluega i Niu Sila ma Ausetalia.
O loo iai le talitonuga o le Malo o ia faiga faavae o le a faatonu folau ai le polokalame, ma alofia ai le toe tulai mai o nisi o faafitauli sa aafia ai nisi o o tatou tagata sa maua ia galuega.
