Ua iai le vaega o le auaunaga faasoifua maloloina e faamamā ai toto mo i latou ua aafia o latou fatuga’o i le maota gasegase o Malietoa Tanumafili II i Tuasivi i Savaii, ma ua le tau agai mamao mai ai i le maota gasegase o Tupua Tamasese Meaole i Motootua.

Ua iai nei foi le fuafuaga a le Malo e ala i le Matagaluega o le soifua maloloina, e fausia se vaega faapitoa o le maota gasegase i Tuasivi mo se fā’ata CT-SCAN ina ia faafaigofie ai foi mo le togafitia o gasegase i Puleono i Salafai.

Ua faailoa lea fuafuaga e le Minisita o le Soifua Maloloina le afioga Valasi Luapitofanua Toogamaga Tafito Selesele, i sona finagalo i le polokalame o le Soalepule, a o tālia ai le aso e tuu aloaia atu ai i le Minisita o le soifua maloloina le masini fā’ata CT-SCAN fou ua mae’a faapipii i le maota gasegase i Motootua.

O le Faalapotopotoga o Taui o Faalavelave Faafuasei o loo i le vaaiga a le Minisita o Alamanuia Pisinisi ma Leipa le tofa Leatinuu Wayne Sooialo, na faatupeina le masini fā’ata fou i le faamoemoe o le Malo ia toe faatumau le auaunaga a le soifua maloloina o loo manaomia tele ai lea masini fā’ata, ua fai si umi o ni tausaga o faaletonu ma mafua ai ona ave i Amerika Samoa nisi o gasegase e manaomia le fā’ata CT-SCAN i suesuega faafomai o o latou gasegase.

O le polokalame foi o le Soalepule a le TV2 na faailoa ai e le Minisita o le Soifua Maloloina, e le o toe mamao ae siitia le falemai faamamā toto i Motootua mai lona nofoaga o loo iai nei, i se vaega o le falemai tuai i le vaega sa iai le fale talavai, e lata i le nofoaga sa iai le falemai o tamaiti ma le fale failele.