O le faai’uga o le masina lenei o Fepuari ua faamoemoe e tuua ai le atunuu e se aumalaga o nisi o le aufaigaluega i le faalapotopotoga o mavaega tausi a Samoa le U.T.O.S. ma le Minisita o Tupe.
O le autū o le malaga o le feiloa’i atu i tagatānuu o Samoa o aumau ma alala i fafo e lesitala o latou sea i le toe faagaioia o malaga a vaalele tetele o le Samoa Airways.
Ua faailoa e le ta’ita’i o le malo le afioga i le Palemia lea fuafuaga a o faagasolo ai le lesitala i Samoa mo o tatou tagata e fia faia ni o latou sea i le kamupani vaalele.
Ua faamoemoe e afea e le Minisita o Tupe le afioga Mulipola Anarosa Ale Molioo ma lana aumalaga, aai o alala ai le mamalu o Samoa i atunuu e pei o Ausetalia, Niu Sila, ma Amerika.
E limaselau tālā ma luga atu e mafai ona lesitala ai se sea o se tagatānuu o Samoa.
